चितवन । माडी नगरपालिकाले पूर्वी माडीको कृष्णनगर र पश्चिमी माडीको गर्दी गाउँमा कृषि तथा पशु सेवा केन्द्र स्थापना गरेको छ ।
दुईवटै सेवा केन्द्रको बिहीबार माडीका नगरप्रमुख ताराकुमारी काजी महतोले छुट्टाछुट्टै कार्यक्रमबिच रिबन काटी समुद्घाटन गर्नुभएको हो ।
समुद्घाटन कार्यक्रममा प्रमुख प्रशासकीय अधिकृत पुष्पराज ढकाल, सेवा केन्द्रका सम्बन्धित क्षेत्रका वडाध्यक्ष, कृषि र पशुपंक्षी शाखाका प्रमुख र कर्मचारी लगायत स्थानीयबासीहरूको उपस्थिति रहेको थियो ।
उद्घाटन कार्यक्रममा बोल्दै नगरप्रमुख महतोले कृषि र पशुपालन पेशालाई व्यवासायिकरणमा सघाउने योजना अनुरुप सेवा केन्द्र विकेन्द्रीकरण गरिएको बताउनुभयो ।
कृषि क्षेत्रको विकासका लागि संघीय सरकारबाट माडीमा ठूलो बजेटको नयाँ कार्यक्रम आएको जानकारी दिँदै उहाँले वडा तथा नगरस्तरको कृषक समितिहरु स्थापना वा पुनर्गठन गरी कृषकको चाहना अनुसारका नयाँ योजनाहरु सञ्चालन गरिने पनि बताउनुभयो ।
माडी नगरपालिकाको पुस १८ गते सम्पन्न १०औं नगरसभामाले २ स्थानमा कृषि तथा पशु सेवा केन्द्र स्थापनाको निर्णय गरेअनुरुप श्रीपञ्चमी पर्वको अवसर पारी सोको उद्घाटन भएको हो ।
#स्वदेश न्युज डेस्क
२०७९ माघ १२ गते बिहीबार साँझ ०६:२० मा प्रकाशित
