काठमाडौँ, ६ चैत । चितवनमा हुने सलोम एग्रीकल्चर पाँचौँ राष्ट्रिय कृषि यान्त्रीकरण प्रदर्शनीको तयारी पुरा भएको छ । चैत ९ गतेदेखि १२ गतेसम्म हुने एक्स्पो भरतपुर महानगरपालिकाको चितवन एक्स्पो सेन्टरको हलमा हुने नेपाल कृषि मेसिनरी व्यवसायी सङ्घले जनाएको छ ।
संघका महासचिव कृष्ण शर्माका अनुसार हालसम्म ९९ प्रतिशत तयारी पुरा भएको छ । कृषि यान्त्रीकरण प्रदर्शनीसँगै कृषि कर्जा मेला पनि आयोजना गरिएको छ । मेलामा करिब ३० देशबाट २ हजार भन्दा बढि मेशिनरी राखिने छ । प्रर्दशनीमा जमिन तयार गर्ने मेशिनदेखि हार्डवयस्ट गर्ने सम्मका मेसिन, ग्रीन हाउस, थोपा सिँचाई, नेपालमा बनेका कृषि मेहिनरी, उन्नत बीउ बिजन, प्राङगारिक मल, बागवाणीमा प्रयोग हुने यन्त्र औजार, मत्स्य पालनमा आवश्यक पर्ने मेशिनहरू राखिने छ । जम्मा १५० स्टल हुने उनले बताए । करिब १ लाख किसानहरूले अवलोकन गर्ने अपेक्षा राखिएको पनि महासचिव शर्माले बताए ।
यो मेलाले व्यवसायी र किसानबिच पुलको काम गर्ने उनको भनाई छ । ‘मेलाले किसान र व्यवसायीबिच पुलको काम गर्छ । जुनकी एकै थलोमा २ हजार भन्दा बढी मेशिनरीको बारे हेर्ने, बुझ्ने, मूल्य, गुणस्तरको विषयमा एकै ठाउँबाट जानकारी पाउने छन् ।’ उनले भने । पछिल्लो समय कृषि मेशिनरीको प्रयोग बढ्दो रहेको भन्दै उनले मेलाले धेरै फाइदा पुग्ने बताए ।
प्रदर्शनी कृषि तथा पशुपन्छी विकास मन्त्रालय, कृषि विभाग, कृषि पूर्वाधार विकास तथा कृषि यान्त्रीकरण प्रवर्द्धन केन्द्र प्रधानमन्त्री कृषि आधुनिकीकरण परियोजना र सङ्घको संयुक्त आयोजनामा गर्न लागिएको हो । नेपालको कृषि तथा पशुपालन क्षेत्रलाई यान्त्रीकरण औद्योगीकरण ,आधुनिकीकरण तथा व्यवसायीकरण गर्न टेवा पुचाउने उद्देश्यले प्रदर्शनी आयोजना गर्न लागिएको हो ।
उक्त प्रदर्शनीमा आधुनिक कृषि, पशुपालन, मत्स्यपालन, पुष्प खेती ,व्यवसायी तरकारी खेती र प्रशोधन तथा बजारीकरण सम्बन्धी आधुनिक यन्त्र, उपकरण तथा प्रविधिका सामाग्री, बीउ विजन, आधुनिक सिँचाई लगायतको राष्ट्रिय तथा अन्तर्राष्ट्रिय क्षेत्रमा रहेका प्रतिष्ठित कम्पनीहरूको सहभागिता रहनेछ ।
यस सङ्घले कृषकहरूलाई आधुनिक कृषि यन्त्र तथा प्रविधिहरूको बारेमा जानकारी गराउने उद्देश्यले सरकारको आयोजनामा पहिलो राष्ट्रिय कृषि यान्त्रीकरण प्रदर्शनी २०७० चितवन, दोस्रो राष्ट्रिय कृषि यान्त्रीकरण प्रदर्शनी २०७२ कोहलपुर ,बाँके, तेस्रो राष्ट्रिय कृषि यान्त्रीकरण प्रदर्शनी, २०७४ धरान र चौथो राष्ट्रिय कृषि यान्त्रीकरण प्रदर्शनी २०७६, चितवनमा सफलता पूर्वक सम्पन्न गरिसकेको छ।
