सामुहिक कृषिबाट महिलाहरूकाे अात्मबल बढेकाे छ : अध्यक्ष गुरौँ ।।
महिला घरायसी काममा मात्र होइन,व्यवसायिक काममा पनि पुरुष भन्दा पनि अब्बल हुन सक्छन् भन्ने उदाहरण पेश गरेका छन्,माडी नगरपालिका-१ गर्दीका थारु महिला कृषक समुहका सदस्यहरुले। थारु समुदायका ५५ जना महिलाहरु समुहमा आबद्द भएर सामुहिक रुपमा हाँस,लोकल कुखुरा,माछापालन संगै च्याउ र केरा खेती गरेर राम्रो आम्दानी लिन सफल भएका छन्। माडी नगरपालिका १ पुर्व वडा अध्यक्ष कृष्ण पौडेलको उत्प्रेरणा र समन्वयका कारण आफुहरु संगठित भएर कृषि कर्ममा जोडिएको समुहकी अध्यक्ष हिरामणि गुरौँले बताउनुभयो ।
माडी नगरपालिकाको आर्थिक सहयोगमा संचालित सो परियोजनामा नगरपालिकाले ६ लाख ७९ हजार १ सय ७५ रुपैंया लगानी गरेको छ भने स्थानीय जनसहभागिताबाट १ लाख ७५ हजार १ सय ७३ हजार रुपैंया जुटाइएको छ । माडी नगरपालिका र स्थानीय समुदायको गरि ८ लाख ५४ हजार ३ सय ४८ को लागत संचालित सो परियोजनाले सामुहिक रुपमा काम गरेमा काम गर्न सहज हुनुका साथै थोरै लगानीमा पनि राम्रो आम्दानी लिन सकिने शिक्षा प्राप्त भएको अध्यक्ष गुरौँको भनाइ छ । समुहमा काम गर्दा समस्या आएको खण्डमा मिलेर समाधान खोजिएको अनुभव सुनाउंदै माछा,हाँस,कुखुरापालन तथा च्याउ र केराखेतीमा काम गर्नका लागि दैनिक रुपमा पालो निर्धारण गरिएको र आफ्नो पालो पर्दा गरेका कामको बारेमा नयाँ पालो पर्ने साथीलाई जानकारी दिने गरेको बताउनुभयो। हाँस किन्नका लागि क्रेताहरु फर्ममा नै आउने गरेको र माग अनुसार हाँस पुर्याउन नसकिएको उहाँको भनाइ छ । बिदेशमा जस्तै नेपालमा पनि मेहनत गरेमा राम्रो आम्दानी लिन सकिने अध्यक्ष गुरौँले उल्लेख गर्नुभयो ।
https://www.youtube.com/watch?v=vC-UzZWxWCc
