अब सिंचाई अभावका कारण माडीका खेतीयोग्य भूमिहरु बाँझो रहदैनन् : नगर प्रमुख महतो ।।
कृषि र सिंचाईलाई विशेष प्राथमिकता दिएर काम गरि रहेको माडी नगरपालिकाले नगरक्षेत्र भित्रका सिंचाईको सुविधा विस्तारका लागि कृषि शाखा मार्फत कुलो निर्माण र भुमिगत सिंचाई (पाईप लाईनिङ्ग) को कामलाई तिब्रता दिएको छ । सिंचाईको सुविधा विस्तार गरि कृषि उत्पादन बृद्दि गर्ने उद्देश्यले माडी नगरपालिका-६ लक्ष्मीनिवासमा निर्माण सम्पन्न भएको भुमिगत सिंचाई (पाईप लाईनिङ्ग) को आज उद्घाटन गरिएको छ ।
पाईप लाईनिङ्गको माडीका नगर प्रमुख ताराकुमारी काजी महतोले एक संक्षिप्त कार्यक्रमका बिच उद्घाटन गर्नुभयो । कार्यक्रममा आफ्नो मन्तब्य राख्नु हुँदै नगर प्रमुख महतोले माडी नगर क्षेत्र कृषि उत्पादनका दृष्टिले अब्बल भुमि भएको चर्चा गर्दै सिंचाई अभावका कारण धेरै खेतीयोग्य भूमिहरु पनि बाँझै रहेको समस्यालाई मनन गर्दै सिंचाईको सुविधा विस्तारका योजनाहरुलाई प्राथमिकतामा राखेर काम गरिएको बताउनुभयो। उहाँले सिंचाईको सुविधालाई विस्तार गर्दै कृषि पेशालाई थप व्यवसायिककरण गर्दै लैजाने माडी नगरपालिकाको योजनालाई भुमिगत सिंचाई (पाईप लाईनिङ्ग) ले थप सहयोग पुर्याएको विचार राख्नुभयो ।
सोहि क्षेत्रमा अर्को भुमिगत सिंचाई (पाईप लाईनिङ्ग) को काम समेत निर्माणको क्रममा रहेको छ। आज उद्घाटन गरिएको पाईप लाईनिङ्गले सो क्षेत्रको २० बिघा क्षेत्रफलमा सिंचाई सुविधा बिस्तार हुने माडी नगरपालिका ६ का वडा अध्यक्ष दीपेन्द्रराज पौडेलले जानकारी दिनुभयो । पाईप लाईनिङ्ग सुविधा बिस्तार भए संगै आफ्नै खेतबाट सिंचाई सुविधा पाइने भएपछि स्थानीय कृषकहरु हर्षित भएका छन् ।
