चितवन । माडीको बाँदरझुलासंगै कृषि र मत्स्यपालन क्षेत्रहरुमा विध्युत बिस्तारका लागि नेपाल विध्युत प्राधिकरणको चनौली वितरण केन्द्रले बोलपत्र (टेण्डर) आह्वान गरेको छ ।
माडी-९, बाँदरझुला (हनुमानझुला) क्षेत्रमा विध्युतिकरणका लागि २ करोड ४३ लाख रुपैंयाको बोलपत्र आह्वान भएको हो । त्यसैगरी माडी उपत्यकाभित्र वडा नं. १ देखि ९ सम्मका कृषि तथा मत्स्यपालन क्षेत्रहरुमा विध्युतिकरणका लागि थप २ करोड २५ लाखको टेन्डर समेत प्रकाशित भएको माडीका नगर प्रमुख ठाकुर प्रसाद ढकालले जनाउनुभयो । यसबाट माडीका भित्री र बिजुली पुग्न बाँकी रहेका स्थानहरुमा सबै स्थानहरुमा बिजुली बिस्तार गरिने वितरण केन्द्रको भनाई छ ।
बाँदरझुला क्षेत्रमा बिजुली बिस्तारका लागि माडीका साँसद समेत रहनुभएका पूर्व प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पहल गर्दै आउनुभएको थियो । बाँदरझुलाका सुकुम्बासीहरुको राजधानी केन्द्रीत आन्दोलनका क्रममा भूमि आयोगसंग भएको तीन बुँदे सहमतीमा समेत सो क्षेत्रमा बिजुली बिस्तार गरिने बुँदा उल्लेख रहेको छ ।
